أنا المصرى

أنا المصري.. كريم العنصرين سليل المخلصين.. المؤمنين وحامي الأمة في وقت الشدايد وشقَّاق السِّكك للواردين ودمّي ملك ليكم.. أجمعين أنا المصري كريم العنصرين *** أنا المصري كريم العنصرين فقدت العقل والصوت والأيدين وبعد ما كنت نجدة وروح ووقفة مانيش عارف نسيت ده كله فين ومين اللي سلبني اسمي مين؟ أنا المصري.. كريم العنصرين..؟ *** أنا مِتباع.. ماهيش عادْتك يا وطني عدوْ.. لِعدو.. ومين ما قبضْش تَمَني صبي البقال يتاجر في الضماير وأحلا عمري ضاع مستنِّي زمني ..بقينا بصمتنا الموت.. مُكتفين أنا المصري كريم العنصرين *** وجُونا اللي رمونا... للمهالك تقول: لأّه .. يقولولها: وانتي مالِك؟ تقول: لبنان.. أحبابنا الأعزّة يقولوا: يغوروا.. وتغوروا كذلك نسيت من همي أبقي إزاي حزين أنا المصري .. كريم العنصرين *** وبعنا كل شئ ينباع.. بِدِقَّة بشفافيّة ومن غير أي سِرقة ونظَّرْنا لِعِلْم النهب.. صرنا بننهب كل شيء.. لكن برقة بقينا دكاترة وسط النشالين أنا المصري .. كريم العنصرين *** زمان كان فيه مَلِك فاحت روايحُه وثوار جيش بروحهم يومها.. ضحّوا وكان لنا شأن حتي في الهزيمة وطن.. كان يعجبك جمعُه وطرحُه علينا عين.. وباقي الأمة عين أنا المصري .. كريم العنصرين *** وعاد تاني الملك يحكم بلادُه ومن بعد السنين دي.. زاد فسادُه وكنا سادة فوق أرض الكنانة وأصبحنا عبيدُه.. أو عِبَادُه وضاع في الزحمة مشوار السنين أنا المصري .. كريم العنصرين *** وده يسلِّم لده والعصر فاجر وتاجر حِنت.. سلّمنا لتاجر وأُم الأمة مصر الإنسانية بتتآمر... وبتداري الخناجر وكنت النجدة واستنجد بمين أنا المصري .. كريم العنصرين *** وكنت أصرخ.. وكان الكلّ يسمع وامِدِّ الإيد.. عدوّ الأمة يرجع وجاني النطع يأمرني ويشخُط وخلاني بقيت في الحق أنطع أنا اللي كنت أصحِّي الغفلانين أنا المصري .. كريم العنصرين *** يا(نصر الله) ده... زمن البياعين وإنت طلعْت للأمة.. منين؟ تفكرنا بكل اللي نسيناه أظنه صعب يصحوا الميتين وخليتنا ـ الجميع ـ متفرجين أنا المصري .. كريم العنصرين؟ *** مازال نفس العدو.. ومازال خبيث أبونا مات وسابْهُولنا.. وَريث ومهما يلف ويدور.. راح يغور وإسأل عِندنا بيوت السويس حلاوة روح.. وحياة الحسين أنا المصري .. كريم العنصرين *** ويالبنان ما تِطْفيش نار نضالِك رجالك.. حتي لو ماحناش رجالك بحور الدم ما تغرّق حقوقك ولا تكسر مجاديف احتمالِك حبيبك.. بس مش قادر أَعِين أنا المصري .. كريم العنصرين مقاطع من قصيدة أنا المصرى للشاعر عبد الرحمن الأبنودى