:: أنواع الشباب على الانترنت ::

:: أنواع الشباب على الانترنت ::

* المدمن *

هاد كل ما تفتح المسنجر بتلاقيه أون لاين و لسه قبل ما تفتح و تقول يا فتاح يا عليم بكون هوه داخل عليك : هلاااا .. كيفك ؟ شو اخبارك ؟ شو عامل ؟ وين هالغيبة ؟ ( عاد هوه بكون حاكي معك قبلها بيوم ) و طبعا كل هاد و انتا بس بتقول : الحمد لله ماشي الحال.

هاد الشخص بكون 24 ساعة عالمسنجر, و لما تشبك و ما تلاقيه بطلعلك بعد دقيقتين بس و بحكيلك : كنت بعمل ريستارت. وبالتأكيد هاد النوع أكتر واحد بياكل بلوك و ديليت.

* الرايق *

يا سلااام على الناس الرايقة, هاد الشب بحاله ولا الو دخل بالدنيا .. يعني بتدخل تحكي معه : مرحبا كيفك؟ يحكيلك : مين انتا ؟
يا سلام عالرواق من كتر ما هوه رايق مش شايف حدا قدامه.
يا ابن الحلال انا رامي صاحبك .. هااا ؟ مين رامي ؟
اهاااا رامي .. آسف حبيبي بس الدنيا برد و هيك المهم كيفك و شو اخبارك ؟
انت بتحكيله : الحمد لله من هون و هوه يختفي من هون.
و بعديها بكم يوم بطلع هوه اون لاين، ساعتها انت بتحكيله : هااا كيفك ؟ يا زلمة أكتر من مرة احكي معك وما ترد ..
بيقوم هوه بيرد عليك : مين ؟ نورا ؟
وعلى هالموال.. لحد ما تزهق و تفقعه بلوك و ديليت و تفجر حالك.

* النسونجي *

هاد أول ما يتعرف على بنت على السريع أول سؤال: ممكن رقمك ؟
هي طبعا ذكية : طب ليه ما نحكي مايك يعني ؟
هوه حدق برضو : لا ما هوه المايك خربان و اهلي كلهم هون و السلك تبع المايك ابصر لما اركبه بروح يطلع صوت و و و و و ..
هي بتزهق منه و بتعطيه الرقم.
طبعا جنت على نفسها براقش, بروح هوه بقزز اهلها تلفونات و كل شوي رسائل من تبعون العيد من هدول تبعون صباحك معطر و يومك اخضر و ابصر شو .
و بالآخر هوه بتصل فيها و بيلقى التلفون مغلق
لا يا سيدي التلفون مو مغلق بس البنت زهقت حياتها و باعت الخط و الموبايل.

* ديري بالك على حالك *

اجينا للتقزيز .. الشب اخد ايميلها من شب صاحبه أو سرقه.. عادي نفس الشي
المهم بروح ضايفها
هي بتسأله: من وين جبت الايميل ؟
:والله اجاني فوروورد و انا آسف اني ضفتك و ازا بتحبي اعمليلي بلوك و ديليت عادي
طبعا هوه عارف انها ما رح تعمله لا بلوك ولا ديليت .. هوه الشب المؤدب عاد كيف تسلخه بلوك.
بس المشكل انو بيصير كل لما بدها تطلع بروح هوه يقزز فيها نص ساعة: ديري بالك على حالك و ابصر شو و لو حكتله انو الدنيا برد, عالسريع بتشتغل الانسانبية عندو :: لا لازم تدفي حالك و خدي دوا و اشربي ليمون و اي شي بدك اياه انا حاضر .
طبعا الشب صار ثقة هلأ و بالأخر الشب بطلب رقمها ( بعين قوية كتيييييير ) بس البنت عرفت في الوقت المناسب انو ضاف صاحبتها و بحكي معها بنفس الطريقة بالزبط.
و بالتالي أكل بلوك و ديليت بنص صباحه.