دخول

دغدغت مشاعري هالبنت


دليل اللسان يبحث عن كلمة ليصف بها ما كانت عليه حالتي ، ضيق ،هم، غم، وحزن ، كان سلك الـ(هيد سيت) قد التف حول رقبتي وقد سقطت السماعات على الارض ، لا بد انني غفوت قليلا بعد ان كنت استمع الى اغنية قديمة لعبد الحليم ، لا ادري ما كانت الاغنية لأنني اعتقد ان اغانيه متشابهة ولا استطيع التمييز . حللت السلك عن رقبتي وذهبت الى (اقرب) مغسلة ، بللت شعري وغسلت وجهي كي استعيد النشاط ... فكرت بالخروج الى احد الشباب ، الساعة 12:40 لأ اعتقد ان احدا سيستقبلني في هذه الساعة المتأخرة من الليل.


ايقنت ان لا مفر من البيت الا اليه ، ذهبت الى الكمبيوتر لأشيّك على الالعاب ( لم استخدم النت كوني مقاطع حاليا ) ، حتى الالعاب مملة فيفا، اندر قراوند، فايس سيتي ،جود فاذر . لطشت الكمبيوتر وطفيتو بسحب الفيش ( اسهل ) ، رحت عالتلفزيون ... الدايزك مفكوك وحالف يمين ما يركب مرة تانية ، يعني ما صفى غير النيل سات ... قلب ، دور ، فتش : كلها اغاني وافلام عربي قديمة واخبار وبرامج سياسية ( من اللي بيجو تنين يحكو وما بنفهم غير اهلا وسهلا بكم بحلقة جديدة ) ..


نكش راسي الوضع ... حكيت احسن شي اطلع عالشارع مأوى الناس القرفانة ، طفيت التلفزيون باستخدام الريموت (رميت الريموت على الكبسة اللي بتطفي التلفزيون ) ... طلعت عالشارع ومشيت 100 متر ، والا كشاف بوجهي وسيارة شرطي بخلقتي : ( ابو الشباب هويتك لو سمحت ) ،... وبكل ثقة (مديت ايدي عالجيبة لقيت الجيبة منكوشة ) ...


يا حرام راحت عليك يا (...) طالع بالليل وناسي المحفظة الله يهديك على هالعملة (تلقى كبة بلى ) ... ، ( اطلع بالسيارة لو سمحت – يا جماعة الخير وحدو الله هي داري هناك اللي عند التكسي الواقف – ما النا بهالحكي اطلع معنا – يا جماعة الخير طيب بنروح عالضار وبنجيب الهوية وبورجيكو ..... ) بعد ربع ساعة اقناع اقتنعو الباشوات اني ( مش دواوين وبضربش مواس واني مسالم لدرجة الطنط ) وروحوني ...المهم ركاض عالدار افتح بالباب مفتوح (طلعت حاطط المفـتاح من برا وناسي اسكر الباب) منيح ما انسرق اشي بهالخمس دقايق ( على اساس انو الحرامي واقف عالباب بستنى بحدا ينسى الباب مفتوح) .


((تملي معاك)) شو صوت هالاغاني هاظ مين اللي ما بستحي اللي مشغل اغاني بهالصوت العالي ... فتت على الغرفة لقيت التلفون هو اللي ما بستحي لأنو قاعد بغني وبضوي كمان ...


تطلعت عالرقم والا هو ( 0788******* ) يا فرحتك يا ( ...) اجا مين يشاركك همومك على اخر هالليلة ، الوو .... ( قالت الوو وانا قلت مين ) .... مين؟؟؟؟ ، اناا وحدة بدي اتعرف وبعرف كل شي عنك ... قلتلها بس انا فقير وما معي مصاري ... قالت عادي انا معي وجيبتي وجيبتك وحدة ... قلت يااااا بنت الحلال انا عارف انو مقلب حللي عني مشان الله قالت طيب زي ما بدك بس ما رح اتركك الا لما اشوفك قلتلها بكرة الساعة 6 المسا ... وافقت ... قلت لحالي يالله فرصة الواحد يتعرف عالجنس الاخر ...سكرت التلفون من هون ونكشني بطني من هون قلت يا ولد روح شفلك شغلة كلها ...


دور لخّم ما في شي افتح هالفريزر والا الاقي كيس ملوخية ( اكسبلينيشن : محسوبكو طباخ ماهر تدريب سكن جامعات ) اطبخ ياللي بتطبخ .. خلصت الطبخة ..، انا بعرف انو الملوخية لما نوكلها بالخبزة عادي بطلع ملوخية مرقة بس انا طلع معي ملوخية لحال والمي ضللت بالصحن كيف لهسه ما بعرف ... المهم مشيت هالليلة على خير ونمت نوم البيات الشتوي وصحيت عال4 العصر ...


اكيد ما رح انسى الموعد عال6 .. قمت وزبطت حالي وانطلقت الى مكان الموعد وانتظرت البنت ... والله والا في بنت جاي ( تهكّ ) وقعدت وحكتلي( هاي) .... قلتلها (اني وحدة) ... بتقوللي (لأ هاي يعني مرحبا ) بحكيلها ( ااااااه سمعتها مرة اه اهلا اهلا اختي اهلا ) بتحكيلي شو بتحب تشرب ... بحكيلها انتي القرسونة؟؟؟ ... بتحكي ها ها ها دمك عسل ( هي مفكريتني بمزح عاد انا مش فاهم اشي ) ضحكت بوجهها وقلت لحالي هاي شكلها البنت اللي حكت معي عالتلفون وشكلها مقرشة ... حكتلها بدي اشرب اغلى شي عندكو ، قصدي عندهم ... نادت على (متر ) حكيت بعقلي شكلها طوبرجية هاي ومتأثرة بالشغل .... المهم اجا شب (نظيف) بتحكيلو( بدي تنين ****** ) ... اعدم خشومي اذا فهمت عليها كلمة والمشكلة هو فهم ... سنحهم ( ليش الناس هجرت اللغة العربية وداقة باللغات الاخرى .. والله لغتنا حلوة وبتجنن ... ما علينا مهما صيحت ما حد رح يفهم ) ...


جاب الاشي وشربنا الاشي ودخت مع الاشي وصارت معي اشياااااء فزيعة ... ودعتها وقمنا وروحت ... بس ما هان علي اتركها ... دغدغت مشاعري هالبنت قلت لازم (نرتبط) رنيت عليها وشغلتلها اغنية ( وحشتك بحبيني – لجسيم الحسني ) وسكرت السماعة فش دقيقة والا هي بترن علي وبس فتحت الخط شغلتلي اغنية ( بحبك يا حمار – لسعد الصغير )... وما لحقت تكمل الاغنية والا هي قلبت على اغنية ( انت شخص بلا ضمير ) وبعد دقيقة قلبت اغنية ( يا ست الحبايب يا حبيبة ) صفنت نتفة وقلت هاي البنت هبلة شكلها وما في 5 ثواني والا في صوت واحد بحكي ( من عمان لكل مكان على الموجة 104.2 ) ... عرفت انو في اشي مشترك بيننا .. كلانا بنحب راديو فن ...


وهاظ الاشي اللي خلانا نتفق ونعيش على انغام الراديو لحتى ما زهقت من نقها وخنقتها بسلك الهيد سيت وقطعتها وصرت كل يوم اطبخ منها طبخة ملوخية بالبشر ...


مشان هيك اذا في بنت غنية وبتحكي انكليزي منيح بتحب ترتبط فيي انا جاهز واللي بدها توخد رقمي من الكونترول

منقووووووووووووووووول

أحلى شي طبخة الملوخية ..... وحشتك بحبيني - لجسيم الحسني تحشيييييييييييششششششش :-)

مواضيع مقترحة


واحدسكرن يقلد ابوترايكة
كيف نتعامل مع البطالة ؟
هل أنت مدخن .. إذا أنت منتحر .. وهذا هو الدليل نداء لمن يبيع سم الدخان
هل تستطيع الاجابة على هذا السؤال
هذا حدث با لمسجد
المقارنة بين عمرو دياب وتامر حسنى
استخدم التطبيق