شو طابخه ؟؟ لما يجهز الغدا بناديك

حوار بين ام وابنها طالب التوجيهي : الام ليش طالع من غرفتك ليش ما ابتدرس؟؟؟ الابن: يما هسه اطلعت!! الام: كيف هسه أطلعت صارلك ساعتين بتحوس في البيت ؟؟ ادخل أدرس !! الابن : لا والله هسه طلعت بس رحت على الحمام وبعدين جعت .. بدي اطمن شو طابخه ؟؟ الام : فوت أدرس ولما يجهز الغدا بناديك ...

يدخل الابن على الغرفه وبعد دقيقتين بطلع من الغرفه ..!! الام : ولك شو مالك انضب في الغرفه فوت أدرس.. الابن : يما درست كثير وطلعت اغير جو... الام : طيب ماشي بدك تغير جو روحلي على الدكانه جيبلي علبه لبن بس من شاااااااان الله ما إطول بدي اقلب طنجرة المقلوبه عشان تتغدى وتفوت تدرس .

بطلع الابن وبكون لابس شحاطة امه وشورت وبلوزه خفيفه وشعرو منكوش ولحيته طويله عشان كتير مشغول بالدراسه ومش فاضي يحلق !!! الابن بشتري علبة لبن وسيجارتين فايسروي فرط من الدكان وبلاقي صحابه قاعدين عند الدكان وبقعد ساعه معهم يدخن ويحكو بكل الامور عدا الدراسه!!!

ولما يرجع على البيت بلاقي امه معصبه وبتستقبلو بكورس مشكل من البهادل : ولك ببعتك عدكان ابتقعد ساعه ولك ما حتخلص التوجيهي غير لما تخلص علي ولك قصرتلي عمري بهسنه والاكل برد وبدي تتغذى عشان ترجع تدرس .. الابن : يما مالقيت في هاي الدكان فرحت على الدكان الحاره الثانيه ..!!! وبعد نقاش عنيف تقتنع الام ولما يمر من جنبها الام : تع جاي ليش ريحتك دخان ؟؟؟ الابن : يما كنت بالدكان وكل الي بدكان كانو يدخنو !!!

بعد الغدا الام: يلا يما الله يرضى عليك قوم ادرس الابن بصوت عالي : وبعدين معك انا كل ما تشوفيني قاعد بتحكيلي قوم ادرس هسه مين التوجيهي انا ولا انتي يعني مصلحتي انا يعني انا بديــ ...!!! يقاطع كلام الابن بضربه صاروخيه من الام بشحاطه بتجاه الابن الذي يهرب بسرعه الى غرفته..
بعد ربع ساعه الام ابتعمل شاي وبتفوت على غرفته بتلاقيه قاعد ببعت مسج لصاحبته او سرحان ...... الخ

هاد المشهد فقط يتكرر يوميا بين الام وابنها طالب التوجهي مع اغلب الطلاب انا ما بقول كل الطلاب ولكن الاغلب هيك بصير !!!! الام ابتحكي لأبنها كلمة ( أدرس) في اليوم الواحد خلال التوجيهي تقريبا 15 مره هاد اقل اشي يعني كل ما اتشوفه سرحان او طالع من الغرفه او او ...
معناته كل فصل اربع شهورالفصلين مع الامتحانات ثمانية شهور بما ان الام ابتحكي لأبنها 15 مره كلمة أدرس كحد أدنى في اليوم ابتطلع الام حاكيه لأبنها طول سنة التوجيهي 3600 مره كلمة أدرس !!!!!!

لو نفرض انه الابن حفظ مقابل كل كلمة ادرس معلومه وحده من الدراسه راح يطلع عنده 3600 معلومه انا متأكد انه لو حفظ 3600 معلومه راح يجيب الاول على المملكه!!!!!!!
لكن الغريب انه الام بس يرسب ابنها ابتقعد تلطم وتقول :والله انه ابني درس ومنهم لله الوزاره رسبوه والتوجيهي حظ

مواضيع مقترحة


شوفو الفرق الظريف بين حليمة بوند وحسين الجسمي
نكت نكت واحد عصبى إتجوز واحده عصبيه الدكتور بيولد مراته..نزل الواديقول للدكتور إبعد إنت أنا هانزل لوحدىمره
فضيحة العرض الخاص لفيلم عمر وسلمى
الــوصــايــا الــثــلاث,,,
الصين تتوقع اختفاء أجزاء من سورها العظيم خلال 20 عاما
العيد غدا..,;وكل عام وانتم بخير