قعدة الشباب في الأردن ( التطعيم )

في حقيقه بتقول انك ما ابتقدر تلمس جميع اسنانك في لسانك !!!!! وأكيد انت هلأ قاعد ابتلمس اسنانك عشان تتأكد من هالحقيقه !!!!!! لأن الإنسان ما بيقتنع في كثير اشياء غير لما يشوف بعينه ويحس بحواسه !!!! اللي بدي أقوله إنو اكثر شباب عمان حالياً طالعه بينهم موضه جديده هي موضة ( التطعيم ) . واللي تعريفه بلغة الشباب: السب بكل لغات الشوارع على عرض الشاب المقابل من خلال استخدام كلمات تمس: الام والاخت والعمه وكل فصيله (الرخويات) ويفترض بالشاب المتلقي للشتائم الضحك بصوت عالي بعد سماع التطعيمات ..!!!

وعلى نفس القاعدة اللي بتقول إننا ما بنقتنع في الكلام غير لما انشوف بعينا ونحس بحواسنا.. بدي اياك اذا كنت من فصيله الشباب ( المطعمين ) تركز معي شوي، وتغمض عيونك دقيقه وتتخيل.. جاهز ؟؟؟
طيب..اتخيل معي انك الان في بيتك،، وعندك صاحبك (المُطعم)،، وهو قاعد قبالك قام واعطاك ورقه مليانه مسبات على الام والاخت والعرض والشرف، إنت ساعتها (وفق النظرية نفسها) ما عملت إشي غير إنك ضحكت، فقام هو، وعلى المبدأ نفسه، وصار يقول الكلمات إياها بصوت عالي على مسمع عيلتك؟ وقدام ابوك وامك!!! هل إنت فعلا ساعتها رح تقبل منه هالحكي وانت بتضحك ؟؟ إذا فعلا عملت هيك، اتخيل معي ؟؟؟ هل رح تشعر بعدها انك زلمة عن جد وقد حالك ؟؟؟ وهل رح تحس بعدها إنك بتستحق تحمل لقب رجل ؟؟؟ هل رح تعتبر نفسك بعدها عندك شرف ؟؟؟
يمكن كثيرين منكم يحكوا يا محمود شو هاللي قاعد بتخبصه؟ كلام الشباب مجرد مزح!! وانا بحكيلكهم اللي بقبل على حاله كل هالحكي بره أو في البيت، ما بيشرفنا يكون عايش بينا وفي بلدنا...
مره حكتلي جدتي إنو جدي الله يرحمه كان كبير القريه عمره 70 سنه، وصدف إنو في شب بالقرية بحب بنت وطالبها بالحلال، لكن لظروف معينة اهلها رفضوا انهم يجوزوه اياها، فما كان من الشب إلا إجا عند جدي وقعد على كرسي قباله وصار يحاول يستعطفه.. لكن جدي ما اعطاه أي أمل، فقام الشب وقال: لو فلانه مش الي مش رح توخد حدن ثاني.. ومع انه البنت ما ابتقربله، ما كان من جدي -كبير القريه- إلا إنو سحب الكرسي من تحت الشب ، وهات ياضرب فيه، ولولا شوي كان سحب المسدس وخلص عليه، بس الشب وقتها طلع سريع ووصل للقريه الثانيه ركض باللحظه .
هاي القصه ابتخطر على بالي كثير لما بسمع شب بسب (بطعم) على شب ثاني، وبقول لحالي ياترى لو جدي كان واقف هون,, وسمع هالكلام.. إيش ممكن يعمل؟ أكيد رح يضرب الشبين بالكرسي، ومش بس هيك، رح يخليهم كمان يلمسوا اسنانهم.. بس مش بلسانهم، رح يلمسوهم ويعدوهم وهم قدامهم على الارض . والله وحده بيعرف إيش ممكن يعمل فيهم بعد هيك.
على فكره .. إنت ابتقدر تلمس جميع اسنانك بلسانك.. بس أنا حبيت امزح معك..

منقول منقول منقول