كان بعاكس بنت في مول

شب كان بعاكس بنت في مول وكان مع البنت اخوها الصغير الشاب ضل يلحق في البنت ويعاكس فيها لما وصلت البنت عند مجموعة شباب صارت تصرخ على الشب وتبهدل فيه الشاب شاف حاله في موقف محرج وخاف ياكل كتله من الشباب الموجودين فكر بسرعه وبعدين راح بكل قوته ضرب البنت كف على وجهها وحكالها انتي طالق طالق طالق !!!!!!!
البنت من الصدمه ما عرفت شو تعمل راحت انفجرت من البكا !!! والشب كمل الفلم و لف ضهرو وراح وهو معصب الموجودين صدقو عنجد انه جوزها وطلقها وصارو يلحقو بالشب ويهدو فيه ويحكوله طول بالك طيب عشان الاولاد حرام عليك والنسوان الموجودات صارو يهدو في البنت ويحكولها ما تخافي بكرا ربنا ببعتلك واحد احسن منه !!!!!!!
بعرف شب في عبدون كتب مره على ورقه عنوان من تأليفه العنوان شارع الدكتور ميكي ماوس عمارة المهابيل بجانب السفاره الاردنيه منزل خميس جمعه السبتاوي !!!! وصار يلف في الشارع وكل ما يشوف بنت يعطيها العنوان ويسألها بس عشان يقعد يعاكس فيها !! والمشكله نص البنات يقعدو يفكرو فين هاد العنوان !!!!!!
يا شباب طيب ليش بتعاكسو بنات الناس كثير هي المناظر الي منشوفها بماعكسات الشباب للبنات وخصوصا في المولات يمكن تحكيلي والله يا خميس يعني شوف البنات شو لابسين هو احنا حجر غصب عنه الواحد بقعد يعاكس ويعلق لكن فقط بدي أسألك هل تقبل انه حد يتحرش بأختك وهي بشارع او يحكي عليها حكي مش مزبوط اذا انت موافق اختك حد يعاكسها عاكس انته البنات
... ممكن تحكيلي يا خميس انا ما الي خوات وانا بحكيلك هل تقبل انه حد يتحرش بإمك واذا قلتلي امي متوفيه بحكيلك بكرا ربنا ببعتلك مين يعاكس بنتك .
في النهايه يا اخوان كما تدين تدان و بدي توعدوني انه موضوع المعاكسه هاد ننساه نهائي اتفقنا