مســـــــــــــــــــــ... عن جريدة الاهرام

الثانوية العامية

كتب - ‏ أحمد إمام
خير اللهم اجعله خير‏..‏ قال إيه وأنا نايم حلمت إن الامتحانات علي الأبواب‏,‏ ولقيت نفسي نجحت بدون أسباب آه والله معلش ما هي الدنيا تلاهي‏,‏ والكل فيها ساهي‏,‏ وما بيسألوش علي حد‏,‏ لأنهم واخدينها بجد‏,‏ طيب يعملوا إيه ما هي ثانوية‏..‏ وبكرة يدخلوا الكلية علشان كده لازم يذاكروا بنشاط وإلا هنستعمل السياط‏,‏ مش احنا موفرين كل حاجة‏

أساتذة ومدارس ودروس خصوصية من غير ديباجة وبنعلمكم كل شئ عربي وعلوم وميكانيكا موش شيكا بيكا والشئ لزوم الشئ‏..‏ وأوعي تفتكروا الفلوس الكتيرة اللي بتدفعوها للمدرسين‏,‏ تقدر تعمل الكادر اللي بقاله سنين‏.‏

آه أصل الحكاية مش بسيطة‏,‏ وبطلوا تعملوا ظيطة‏,‏ دا احنا كل يوم بنعمل لكم نظام جديد‏,‏ متقوي ومتسلح بالحديد‏,‏ نظام الثانوية العامية اللي عاوز ناس ما بتحبش البامية‏..‏ والكليات كتير وبالتنسيق المريح والمجاميع بسيطة وما بتجريش مع الريح‏,‏ ولا يهمكم الكلام اللي بيتقال‏,‏ بس انتم هاتوا لنا‏100%‏ وهتدخلوا الطب بدون محال‏.‏

والسنة الجاية هنغير لكم النظام‏,‏ علشان كله يبقي تمام‏,‏ وهنفتح لكم كليات في الكونغو وأمستردام‏..‏ طبعا ما انتم متفوقين ومتصدقوش كلام المجانين‏,‏ ونصيحتي لكم‏,‏ ناموا كتير بس علي الجانب اليمين‏,‏ أصل فيه البركة والنجاح المبين ولكن يا خسارة اتقلبت علي جنبي الشمال‏

وفجأة ضاع حلمي المنال ولاقيت الثانوية العامية جاية بتبخ سمها وعموما مبروك مقدما‏..‏ وأشوفكم عند قبرها‏.‏
مس___ـــــ عن جريدة الاهرام