هلوسة : يارب يرجع الجاج (يفلوز)

وتتعدد دائما سواليف ابي عن (زمان) بخيره وشره, ببساطته وتعقيده بكل ظروفه حتى الخاص منها, فمن دراسته في دبين ومعلمته (ام طارق الى (سيل الزرقا) حيث كان يسكن في قريتنا المطلة على السيل, يسولف عن الجريشة وخبز الذرة والنخالة وعن اللحم اللي ما كانوا يشوفوه غير لما (يتوهرف) جدي عن (الطور) ويلحقوه بالسكين او لما (عنز) (تقرق) او يصيبها مرض فكانوا يشركوها عشان كل عيلة يطلعلها شذاه او طراف او معلاق وساعتها الكل بيوكل لحمة.
وكانت ذكرياته عن اايم زمانه انه الليمون والبندورة والفقوس والباذنجان ببلاش وانه اللبن والشنينة واللبنة الدحابير على قفا من يشيل وكان حتى اللي ما عنده مارس قمح يطلع بعد الحصيدة يلقط وراء الحصادين ويسوي طحين وسليقة وبكيلة تكفيه شهور, وهاي شوية من سواليف ابوي.

أما شو رح تكون سواليفي لبناتي بعد ما يكبرن (صحيح شو بدي اسولفلهن??) لازم اسولفلهن زي ابوي ما سولفلي, بدي اقول انه المدارس صارت تهد الحيل وانه البندورة والخيار تحولن لفواكه ومحلات الخضرة صارت صيدليات وانه مية الشرب صارت زي الدوا, اما من ناحية (اللحمة) فهناك شبه كبير جدا بين زمان وهسا لانه احنا كمان بطلنا نقدر نوكل لحمة الا لما تمرض, لما (انجن البقر) صرنا (نتارع) لحمة ولما (فلوز الجاج) صرنا نقاقي قد ما اكلناه, ولما (دود السمك) (بلبطنا) قد ما رخص, لكن لما رجع صنف اللحوم سليما ومعافى رجع شاف حاله علينا, فرجعنا احنا للماجي وللبيض (المصنن) واللحم المجمد والمرتديلا اللي ريحتها طالعه, هاي سوالفنا عن التراث اللحومي عندنا.


* يارب يرجع الجاج (يفلوز) وتكثر فيه السلامونيلا, (وينجن) البقر وتصيبه كل الامراض النفسية اللي بالدنيا, (والحمة القلاعية) تهري الخرفان ويوكل (السمك) كل الطحالب السامة الموجودة في المي.

اما بالنسبة للخضرة فيا رب البندورة (تنشف) من الذبابة البيضا, ويارب البصل (يصنن) والخس (يمنن) والفجل (يفرول) والقمح (يدرع).

* يارب (اتفلوز) مرتي (حتى ترخص ) طلباتها.

* (وعلى سيرة اللحمة) يا رب كل ملكات جمال العالم (ينجنن) او (يفلوزن).

منقول /رم

مواضيع مقترحة


الـــعـــرب والعصفور
فرقة الدبكة
(الحج) عبادة شاملةالحج هو عبادة شاملة :
بصمات بصمت
زوجات الملك الأربعة! للفائدة والعبرة
. ( عشـرة أسـرار تـجـذب الـنـاس تــجـاهــك ) .