ياجماعة حد يصحينى انا بحلم (صح)

كنت قاعد فى البيت فى هدوء كده وسكينه...زى ما بيقولوا كافى خيرى شرى.
وحاسس براحه جميله اوى....ودى طبعا مش بتبقى موجوده على طول.....
اصل انا بعد ما جيت من الشغل اخدت دش سخن جميل اوى..فوقنى..وأكلت..ومسكت كوباية الشاى والريموت فى الايد التانيه...واخذت نفس كده عميق وانا مجدوع على الكنبه الاسفنج.....اصل الكنبه دى مريحه اوى.
بحب ارمى همومى عليها...كنبه كده تحس انها مليانه حنيه..!!
تن..تن..........تن..تن
ده جرس الباب...مين الغلس ده دا وقته برده...
قمت بكسل اوى كده ومشيت لغاية الباب......مين....فاتورة الكهربه......ومفيش داعى لذكر الرقم الى مكتوب فيها.
قلتله ايه ده الرقم ده كتير اوى....قالى وهو مكشر اوى وصوته باين عليه الهم والغم....اصلهم باعوا الشركه(خصخصوها)
اه...طيب ما باليد حيله ....دفعت الفلوس ...ودخلت قلت لنفسى بلاش تليفزيون..من باب التوفير يعنى...ومالها الضلمه كلها شاعريه وجوها مريح..
بصيت للكنبه الاسفنج بعطف كده وقلتها خلاص دمى اتعكر...بس حاولت انى استريح شويه عليها...
تن ..تن.........تن..تن
دا جرس الباب...خير ...رحت فتحت الباب...مين....فاتورة الميه....هات يا سيدى..... وبصيت كده لقيت رقم كبير اوى....ايه ده كتير اوى كده...اصلهم باعوا الشركه (خصخصوها)...ما باليد حيله دفعت الفلوس...ودخلت قولت لنفسى خلاص مفيش استحمام تانى....
دمى اتعكر واثر الدش السخن خلاص راح...وده احتمال يبقه اخر دش سخن...
تن..تن...........تن...تن
مين...فاتوره الغاز
ملحقتش اخد نفسى ولقيت الجرس بيرن تانى.
تن..تن........تن..تن
مين خلاص انا حفظت رديت وقولت ايه فاتورة ايه
الزباله..
خلتنى واقف على الباب مستنى طلع واحد وقالى التليفون يا باشا...لا انا خلاص..
دخلت بسرعه وغيرت هدومى....الحق اخرج قبل ماحد تانى يجى...
وانا خلاص معيش فى جيبى الا شويه فكه......على الرغم انى لسه فى اول الشهر.
خرجت وانا فى حالة زهول من الى بيحصل.
وانا نازل لقيت جارنا الى تحت خارج من شقته وعلى كتفه حاجه غريبه اوى...ايه ده..استغربت...بس انا اتعودت انى مدخلشى فى الى مليش فيه...انا مالى خلينى فى حالى..
خرجت الشارع ولسا ببص كده بعنيه لقيت الناس اللى فى الشارع هما كمان معلقين على كتفهم.. بتاع كده..زى جارنا..استغربت وقلت انا مالى خلينى فى حالى..
شويه ولقيت عربيه شكلها غريب اوى..وقفه فى الشارع وسداه..وفى علامات مرور فى الارض كتير اوى...وكل واحد يجى يعدى...يوقفوه ويبصوا على البتاع ده الى على كتفه..ويقولوله عدى..واحد من الى وقفين قالى....فين العداد بتاعك...قلت عداد ايه مش فاهم حاجه.....قالى انت هتستعبط..وخدنى من ايدى وودانى للراجل الكبير بتاعهم...
راجل شكله محترم جدا...قلته هو فى ايه انا مش فاهم حاجه....قالى انت مش مركب عداد ليه .....عداد ايه يا باشا والله ما اعرف حاجه..
طبطب على وقالى انت باين عليك غلبان..!!
بص يا ابنى...اصل شوارع البلد باعوها (إتخصخصت) ولازم يحطوا لكل واحد عداد على كتفه علشان يعرفوا هو مشى كام كيلوا وفى اول كل شهر يدفع الفاتوره.....!!!
الراجل عمال يتكلم وانا عنيه مفتوحه على الاخر وصوته عمال يرن فى ودانى...وبقى مفتوح على الاخر.. تنحت كدة ووقفت مبلم
وراح جاى واحد وركبلى عداد على كتفى..
انا عارف انى دى تهيوئات وهم ..انا بحلم صح...
يا جماعه حد يصحينى ويقولى انى ده حلم....!!!!!

اخوكم كاجوو

هههه دمك شربات يا كاجو ههه بس ده مش حلم دي حقيقة مجتمعنا الحالي والله مش ناقص الا العداد … ربنا يستر على اللي جي

هههههه… اه والله يا كاجو ده اللى ناقص فعلا كل واحد يمشى بعداد مهى الفواتير نقصه كمان فاتوره المشى فى الشوار …شكرا كاجو على الموضوع الجامد ده

هههههه… تسلم يا عبدووو

اوعى تصى لحسان الحقيقة امر من الحلم خليك فى الحلم

خليك بتحلم احسن حتى لو كان الحلم سيء … لانه على اي حال احسن بكتير من الواقع و تقدر تتمرد و تعمل حاجات

ههههه حلوة اوي حكايه العداد والله ده اللي ناقص يا كاجوووووووو